Pikat kufitare me Malin e Zi duket se janë portat kryesore hyrëse e parave me burim të dyshimtë. Aksionet e fundit të policisë kufitare në këtë pikë tregojnë një nivel rekord parash të padeklaruara që janë sekuestruar në kufi. Në më pak se një javë, dy aksione të policisë shqiptare dhe një i policisë malazeze në pikat e kalimit kufitar të Muriqanit dhe Hanit të Hotit kanë sekuestruar gati 2 milionë euro, ku një milionë euro janë bllokuar në Muriqan dhe gati një milionë të tjera në Han të Hotit. Shifra më e madhe është sekuestruar ditën e mërkurë në Han të Hotit nga autoritetet malezeze. Prokuroria speciale e Malit të Zi njoftoi se ka sekuestruar 950 mijë euro të fshehura në një kamion mallrash të drejtuar nga një shtetas shqiptar. Policia shqiptare ka sekuestruar në Muriqan 680 mijë euro më datë 15 nëntor dhe ka arrestuar një 51 vjeçar shqiptar, ndërsa më 18 nëntor po në këtë pikë të kalimit kufitar u bllokuar 330 mijë euro të tjera dhe u arrestua një 36 vjeçar.