Një prokuror turk ka kërkuar një dënim të mundshëm me burg prej më shumë se 2,000 vjetësh për kryetarin e bashkisë së Stambollit Ekrem Imamoglu, i cili është i burgosur që nga marsi në pritje të gjyqit për akuza për korrupsion, që ai dhe partia e tij kryesore opozitare i mohojnë. Aktakuza, e paraqitur nga Kryeprokurori i Stambollit, akuzon Imamoglun dhe 401 persona të tjerë për përfshirje në një rrjet korrupsioni që dyshohet se i shkaktoi shtetit 160 miliardë lira ose 3.81 miliardë dollarë dëme gjatë një periudhe 10-vjeçare. Saktësisht 2352 vite burg janë kërkuar në aktpadi. Imamoglu, një figurë kryesore e opozitës nga Partia Republikane Popullore në opozitë, dhe i konsideruar si rivali më serioz i Presidentit Rexhep Tajip Erdogan, u burgos në mars bashkë me 105 persona të tjerë si pjesë e një hetimi të gjerë. Kryeprokurori Akin Gurlek u tha gazetarëve të martën se hetimi tani ka përfunduar dhe prokurorët kanë përpiluar një aktakuzë prej 3,900 faqesh që përshkruan 143 vepra të veçanta penale që përfshijnë 402 të dyshuar. Sipas tij, aktakuza përqendrohet te manipulimi i tenderave komunalë dhe blerjet e paligjshme të pronave gjatë kohës së Imamoglu si kryetar bashkie.