Pas alarmin për numrin e lartë të emigrantëve shqiptarë që po mbërrijnë me gomone në Mbretërinë e Bashkuar, por edhe replikave të ashpra mes kryeministrit Edi Rama dhe qeverisë së Rishi Sunak, mediat britanike duket se janë stacionuar në Tiranë dhe Kukës, E fundit që ka realizuar një reportazh të gjatë për rrugën që ndjekin shqiptarët, është gazeta “Daily Mail’. Për të demonstruar këtë rrugëtim sa të shtrenjtë, aq edhe të vështirë, prestigjiozja britanike, ndalet në një agjenci autobusësh, që arrin të dërgojë shqiptarët me lehtësi deri në vende të caktuara të Europës. Duke vëzhguar agjencitë turistike shqiptare, gazeta zbulon se disa kanë si destinacion Anglinë dhe qytetet si Londra, Birmingham, Liverpool dhe Kent, edhe pse autobusët e tyre ligjërisht nuk munden t’i çojë shqiptarët deri në Mbretërinë e Bashkuar. Por një pjesë e madhe e tyre arrin të shkojë në Britani gjithsesi. E përditshmja britanike ndalet të takojë jo vetëm pronarët e agjencive, por edhe banorë dhe emigrantë, që vijnë nga qytete të ndryshme të Shqipërisë, të cilët presin me çanta në krah nisjen drejt rrugëtimit të tyre sfilitës, por aq shumë të ëndërruar, Mbretëria e Bashkuar. Daily Mail zbulon se pasi arrijnë në Belgjikë, nëpërmjet këtyre agjencive, shqiptarët zakonisht marrin transport për në Normandi. Më pas kërkojnë një ndërmjetës, i cili, në këmbim të disa mijëra eurove, do t’i sistemojë në një gomone që shkon përtej kanalit.