Polonia publikoi të hënën detajet e "Mburojës Lindore", një program që kushton mbi 2.55 miliardë dollarë për të forcuar mbrojtjen përgjatë kufirit të saj lindor me Bjellorusinë dhe Rusinë, duke thënë se shpreson që planet të përfundojnë deri në vitin 2028. Kufiri ka qenë një pikë e nxehtë që kur emigrantët filluan të dynden atje në vitin 2021, pasi Bjellorusia, një aleat i ngushtë i rusisë, hapi agjenci udhëtimesh në Lindjen e Mesme duke ofruar një rrugë të re jozyrtare për në Evropë, një lëvizje që Bashkimi Evropian tha se kishte si qëllim krijimin e një krize. Ministria polake e mbrojtjes paraqiti detaje të programit, duke përfshirë planet për të ndërtuar fortifikime, qendra dhe sisteme telekomunikacioni në koordinim me aleatët e tjerë të NATO-s, Finlandën, Estoninë, Letoninë dhe Lituaninë, në vijën e frontit lindor. "Ky përbën një sistem kompleks të aktiviteteve mbrojtëse dhe parandaluese. Ai lidh sistemet por ne do të vendosim gjithashtu edhe sisteme moderne anti-drone dhe zbulimi," tha Ministri i Mbrojtjes Ëladyslaë Kosiniak-Kamysz. "Ky është operacioni më i madh për të forcuar kufirin lindor të Polonisë, krahun lindor të NATO-s, që nga viti 1945," tha ai në një konferencë shtypi. Zëvendësministri i Mbrojtjes Cezary Tomczyk tha se investimet do të nisin në tremujorin e parë të 2025 dhe priten të përfundojnë deri në vitin 2028. Polonia shpreson të shfrytëzojë fondet e BE-së për disa nga projektet. Qeveria e mëparshme e Polonisë ndërtoi një gardh në kufirin me bjellorusinë, më shumë se 180 km i gjatë dhe 5.5 metra i lartë, për të ndaluar kalimet e paligjshme. Gardhi plotësohet nga një sistem kamerash dhe sensorësh që monitorojnë kufirin.