Komisioni Evropian ka bërë të ditur se do të ndajë 2.3 miliardë euro për të mbështetur Ukrainën që të rindërtohet pas dëmit që i është shkaktuar nga lufta e Rusisë. Në fonde përfshihen 1.8 miliard euro si kredi dhe 580 milionë euro si grante prej institucioneve ndërkombëtare dhe institucioneve për financim publik, tha presidentja e Komisionit Evropian, Ursula von der Leyen në një konferencë në Romë, duke folur për planet për rindërtim të Ukrainës. Konferenca u mbajt ndërsa qindra dronë rusë dhe dhjetëra raketa goditën Kievin në orët e hershme të mëngjesit, duke vrarë dy persona. Në takimin e mbajtur në kryeqytetin italian, Ukraina ka kërkuar ndihmë urgjente nga partnerët. Fondi prej 2.3 miliardë eurosh është pjesë e Kornizës për Investime në Ukrainë, e cila sipas von der Leyenit mbledh rreth 10 miliardë euro për investime në Ukrainë. Ajo ka bërë të ditur për krijimin e një fondi të ri aksioner për rindërtimin e Ukrainës, të përkrahur nga Banka Evropiane e Investimeve, Franca, Gjermania, Italia dhe Polonia. Me një kapital fillestar prej 22 milionë eurosh, fondi synon të mbledhë 500 milionë euro deri më 2026, bëri të ditur Komisioni Evropian. Pjesëmarrësit në konferencën e Romës kanë premtuar në total mbi 10 miliardë euro për të ndihmuar vendin e shkatërruar nga lufta. Kryeministrja italiane Georgia Meloni dhe kancelari gjerman Friedrich Merz përmendën rimëkëmbjen e vendeve të tyre nga rrënojat e Luftës së Dytë Botërore si një shembull të asaj që mund të arrijë Ukraina. "Mendoj se duhet të jemi krenarë për rezultatin që kemi arritur së bashku sot - kombet, organizatat ndërkombëtare, institucionet financiare, autoritetet lokale, sektori i biznesit dhe shoqëria civile", tha Meloni. "Së bashku, në konferencën e sotme, kemi marrë angazhime që arrijnë në total mbi 10 miliardë euro", shtoi ajo. Konferenca që Italia po organizon është ngjarja e katërt e tillë që kur Rusia pushtoi fqinjin e saj në shkurt 2022 dhe synon kryesisht mobilizimin e mbështetjes ndërkombëtare për Ukrainën.