Kina kreu sulme me raketa dhe dërgoi avionë luftarakë të armatosur me raketa dhe bombardues, të premten, tha transmetuesi shtetëror CCTV, si pjesë e stërvitjeve që Pekini ka thënë se kanë si qëllim ndëshkimin e presidentit të ri të Tajvanit, Lai Ching-te. Bombarduesit u ngritën në formacione sulmi në ujërat në lindje të Tajvanit, duke kryer sulme të simuluara në koordinim me anijet detare, shtoi transmetuesi shtetëror, ndërsa Kina testoi aftësinë e saj për të "marrë pushtetin" dhe kontrollin e zonave kryesore të Tajvanit. Stërvitjet dyditore në ngushticën e Tajvanit dhe rreth grupeve të ishujve të kontrolluar nga Tajvani pranë brigjeve kineze, për të cilat një zyrtar tajvanez tha se përfshinin edhe bombardimet e modeleve të anijeve të huaja, filluan vetëm tre ditë pasi Lai mori detyrën. Tajvani ka dënuar veprimet e Kinës. Kina e sheh Tajvanin e qeverisur në mënyrë demokratike si territorin e saj dhe e konsideron presidentin Lai si një "separatist". Kina kritikoi ashpër fjalimin e tij të inaugurimit, në të cilin ai i kërkoi Pekinit të ndalonte kërcënimet e tij dhe tha se të dy anët e ngushticës "nuk janë në varësi të njëra-tjetrës". Ushtria popullore kineze tha se stërvitjet, të quajtura "Shpata e Përbashkët - 2024", kishin si qëllim "testimin e aftësisë për të marrë nën kontroll, për të nisur sulme të përbashkëta dhe për të pushtuar zona kyçe". "Ky veprim është plotësisht i arsyeshëm, ligjor dhe i nevojshëm për të luftuar arrogancën e 'separatistëve të Tajvanit' dhe për të penguar ndërhyrjen e forcave të jashtme," tha një zëdhënës i ministrisë së mbrojtjes të Kinës.