Dhëndri i Donald Trump, Jared Kushner paraqiti në Forumin Ekonomik Botëror në Davos vizionin e tij për Gazën e pasluftës, duke e lidhur drejtpërdrejt rindërtimin e enklavës me çmilitarizimin e Hamasit. Sipas Kushnerit, dështimi i planit do të ishte i pashmangshëm nëse Hamasi nuk heq dorë nga armët. Ai e cilësoi çmilitarizimin si kushtin kryesor për rikthimin e stabilitetit dhe zhvillimit në Gaza. Plani, pjesë e fazës së radhës të marrëveshjes 20-pikëshe të armëpushimit mes Izraelit dhe Hamasit, parashikon transformimin e Gazës në një zonë me turizëm bregdetar, ndërtimin e një porti, aeroporti, 180 rrokaqiej, si dhe krijimin e dy qyteteve të reja, “Rafahu i Ri” dhe “Gaza e Re”. Sipas Kushnerit, synimi është rindërtimi i shpejtë i banesave, shkollave, spitaleve dhe krijimi i vendeve të punës.