Policia thotë se ka identifikuar 37 protestues si autorë të hedhjes së molotovit dhe fishekzjarreve në drejtim të punonjësve të policisë. Nga këta, uniformat blu të Tiranës njofton se janë arrestuar 18, ndërsa 17 të tjerë janë proceduar penalisht dhe dy janë shpallur në kërkim. Mes të proceduarve penalisht janë tre deputetët demokratë, Luçiano Boçi, Gazment Bardhi dhe Klevis Balliu, si dhe sekretari organizativ i Partisë Demokratike, Ervin Minarolli. Ndaj këtij të fundit, policia thotë se dyshohet për veprën penale organizimi dhe pjesëmarrja në grumbullime e manifestime të paligjshme, ndërsa procedimi për tre deputetët është bërë me akuzën e kundërshtimit të policisë. Policia thotë se 11 punonjësit të cilët mbetën të dëmtuar gjatë tubimit morën mjekim në spital dhe janë jashtë rrezikut për jetën.