Presidenti Emmanuel Macron prezantoi të enjten një plan të ri kombëtar të shërbimit ushtarak, ndërsa Franca kërkon të forcojë trupat e saj të armatosura për t'iu përgjigjur shqetësimeve në rritje mbi kërcënimin e Rusisë ndaj kombeve evropiane përtej luftës në Ukrainë. Macron njoftoi se vullnetarët e moshës 18 dhe 19 vjeç do të fillojnë të shërbejnë vitin e ardhshëm në një program të ri 10-mujor të shërbimit ushtarak. "Një shërbim i ri kombëtar do të krijohet gradualisht, duke filluar nga vera e ardhshme", tha Macron në një fjalim në bazën ushtarake Varces, që ndodhet në Alpet Franceze. Vullnetarët e rinj do të shërbejnë vetëm në territoret e Francës, jo në operacionet ushtarake të Francës jashtë vendit, tha Macron. Më herët këtë vit, Macron njoftoi qëllimin e tij për t'u ofruar të rinjve francezë një mundësi të re për të shërbyer vullnetarisht në ushtri. Rekrutimi, të cilin Franca e mbylli në vitin 1996, nuk po merret në konsideratë. Ai tha se Franca po kërkon të forcojë mbrojtjen e saj, ndërsa lufta e Rusisë në Ukrainë e vë kontinentin evropian në "rrezik të madh". “Ditën që i dërgoni një sinjal dobësie Rusisë, e cila prej 10 vjetësh po kërkon të bëhet përsëri një fuqi perandorake, ajo do të përparojë”, tha Macron. Makron ka njoftuar 6.5 miliardë euro shpenzime shtesë ushtarake në dy vitet e ardhshme. Ai tha se Franca do të synojë të shpenzojë 64 miliardë euro në shpenzime vjetore për mbrojtjen në vitin 2027, viti i fundit i mandatit të tij të dytë. Kjo do të ishte dy herë më shumë se 32 miliardë eurot në shpenzime vjetore kur ai u bë president në vitin 2017. Ushtria e Francës aktualisht përfshin rreth 200,000 personel aktiv dhe mbi 40,000 rezervistë, duke e bërë atë të dytën më të madhe në Bashkimin Evropian, menjëherë pas Polonisë. Franca dëshiron të rrisë numrin e rezervistëve në 100,000 deri në vitin 2030.