Rreth 170 mijë njerëz marshuan në madrid të shtunën, në protestën më të madhe të mbajtur deri më sot kundër një ligji amnistie për të cilin socialistët spanjollë ranë dakord, në lidhje me tentativën separatiste të katalonjës në 2017-ën, me qëllim që të arrihet krijimi i një qeverie. Demonstrata, më e fundit në një seri protestash në qytetet e vendit kundër amnestisë, u zhvillua dy ditë pasi kryeministri socialist i spanjës, Pedro Sanchez, fitoi një mandat të ri katër vjecar, me mbështetjen e partive katalane dhe baske, në këmbim të miratimit të ligjit. Protestuesit, me flamuj spanjollë në duar dhe me pankarta në të cilat shkruhej: Sanchez tradhëtar dhe Mos e shit Spanjën...demonstruan kundër ligjit që katër shoqata të drejtësisë, partitë politike të opozitës dhe liderët e biznesit thonë se kërcënon sundimin e ligjit dhe ndarjen e pushtetit. Autoritetet përllogaritën se numri i demonstruesve ishte rreth 170 mijë. Alberto Nunjez Feijoo, lider i partisë konservatore të popullit, dhe Santiago Abascal, lider i partisë së ekstremit të djathtë, Vox, morën pjesë po ashtu në marshimin e organizuar nga grupet civile. Pas marshimit, qindra protestues u ndalën në rrugën pranë pallatit Moncloa, rezidenca e kryeministrit në Madrid. Rruga u mbyll për një orë por më vonë u rihap pasi policia pastroi zonën. Amnestia do të mbulonte 400 persona të përfshirë në përpjekjen për pavarësi që u ndërmor në 2017-ën, përfshirë seperatistët por edhe policët e përfshirë në përleshje me aktivistët. Referendumi i pavarësisë u shpall i paligjshëm nga gjykatat dhe rezultoi në krizën më të rëndë politike në spanjë, për dekada të tëra.