Mbyllet njëri i grup klasës së 12 në gjimnazin “Dhaskal Todri” në Elbasan. 17 nxënësit e këtij grupi kanë rezultuar pozitiv me covid 19. Disa ditë më parë rezultuan pozitiv 9 nxënës, tashmë në 24 orët e fundit rezultuan të prekur edhe pjesa tjetër. Ndërkaq mësohet se edhe mësuesja kujdestare është karantinuar në banesë. Nisur nga situata Inspektoriati Shëndetësor ka marrë masa për mbylljen e klasës, ndërsa bashkia është angazhuar me dezinfektimin e të gjithë shkollës. Grupi tjetër i po kësaj klase vijon mësimin normalisht. Mësohet se nxënësit e infektuar me koronavirus janë në gjendje të mirë shëndetësore. Ata janë karantinuar në banesat e tyre dhe po ndjekin mësimin online. ditët e fundit ka pasur një shtim të rasteve të infektuara me covid 19 në institucionet e arsimit parauniversitar. Ndërkohë edhe në Pogradec është mbyllur kopshti në lagjen nr 2, pasi 4 edukatoret e tij kanë rezultuar pozitive me covid 19. Pak ditë më parë edhe dy sanitare në këtë kopsht rezultuan pozitive, ndërkohë që gjithë personeli do t’i nënshtrohet testimeve. Përvec rasteve të shprëndara në shkolla të ndryshme, rastet më të shumta u shënuan në tiranë në shkollën 9 vjecare ‘emin duraku’, ku rezultuian pozitiv me koronavirus 10 mesues dhe 3 sanitare, si dhe një pjesë e mirë e mësuesve të tjerë janë karantinuar. Ndërkohë mësimi ka vijuar normalisht në shkollën “Emin Duraku”, dhe të gjithe mësuesit e karantinuar janë zevendësuar.