Spirit Airlines ka filluar të anulojë fluturimet. Kompania ajrore njoftoi pasagjerët që mbërrinin në aeroporte për një fluturim me Spirit se nuk ishte në gjendje të ofronte shërbim, duke i këshilluar ata që të rirezervonin udhëtimin e tyre me një linjë ajrore tjetër. Mbyllja e kompanisë vjen pasi çmimet e larta të karburantit dolën jashtë planeve financiare të kompanisë ajrore. Përpjekjet për të arritur një marrëveshje me administratën Trump mbi një paketë mbështetëse rezultuan të pasuksesshme. Ky vendim priet që të ndikojë jo vetëm tek pasagjerët e linjës ajrore Spirit por edhe të lërë pa punë 17 mijë punonjës të kësaj kompanie. Eliminimi i fluturimeve të linjës ajrore ka të ngjarë të rrisë gjithashtu çmimet e biletave në të gjithë industrinë ajrore amerikane. Të gjitha kompanitë ajrore kanë pasur probleme me kostot e larta të karburantit për avionët, të cilat pothuajse janë dyfishuar që nga fillimi i luftës në Iran. Një pjesë e linjave ajrore kanë  rritur çmimet  dhe tarifat. Por konkurrenca e ashpër i ka penguar ata të kalojnë të gjitha kostot te klientët. Sipas analizave, linja ajrore Spirit kishte rreth 9,000 fluturime të planifikuara nga 2 maji deri në fund të muajit. Këto fluturime kanë një total prej 1.8 milion vendesh. Pra, kjo është një mesatare prej rreth 300 fluturimesh dhe 60,000 pasagjerësh potencialë në ditë të prekur vetëm në një muaj.