Ministria e Mbrojtjes e Tajvanit tha të martën se kishte identifikuar një numër rekord prej 153 avionësh ushtarakë kinezë të angazhuar në lojërat e luftës që kina zhvilloi rreth ishullit një ditë më parë, duke detajuar një rritje të aktivitetit të avionëve luftarakë. Kina tha se stërvitja njëditore, e quajtur "Shpata e Përbashkët-2024B", ishte një paralajmërim kundër "akteve separatiste" pas një fjalimi të presidentit të Tajvanit, javën e kaluar, në ditën kombëtare, që kishte zemëruar Pekinin. Stërvitjet nuk ishin vetëm shqetësim për Tajvanin, por rrezikonin të destabilizonin rajonin, thanë zyrtarët e ishullit. "Çdo stërvitje pa paralajmërim paraprak do të shkaktojë shqetësim të madh për paqen dhe stabilitetin në të gjithë rajonin," shtuan ata. Në një përditësim mbi aktivitetin ushtarak kinez rreth ishullit, ministria e mbrojtjes së Tajvanit tha se zbuloi 153 avionë ushtarakë rreth ishullit, shifër kjo që tejkalon atë të së hënës, prej 125 avionësh, që ishte konsideruar një rekord. Një hartë e ministrisë tregoi se 28 prej atyre avionëve kishin kaluar vijën e ndjeshme ndarëse të ngushticës së Tajvanit, e cila më parë shërbente si një lloj kufiri zyrtar që kina sidoqoftë thotë se nuk e njeh. Zona të tjera që panë aktivitet intensiv të ushtrisë kineze, ishin ujërat pranë bregut juglindor, ku edhe ndodhet një bazë e madhe ajrore e Tajvanit, dhe në jugperëndim të saj, në pjesën e sipërme të Detit të Kinës Jugore, ku ndodhen ishujt Pratas të kontrolluar nga Tajvani. Gjithashtu u panë 14 anije të marinës kineze dhe 12 anije të rojës bregdetare. Stërvitjet e Kinës nxitën shqetësimin e Shteteve të Bashkuara dhe aleatëve të saj, me Pentagonin që i cilësoi ato si "të papërgjegjshme, joproporcionale dhe destabilizuese". Tajvani është ankuar për aktivitetin e shtuar kinez rreth tij pothuajse cdo ditë gjatë pesë viteve të fundit, dhe Kina ka zhvilluar të paktën katër raunde lojërash luftarake në shkallë të gjerë që nga viti 2022.