Festivali i 189-të i Tetorit, festa më e madhe popullore në botë, ka hapur dyert të shtunën në Mynih. Që në orët e para të mëngjesit ishin krijuar radhë të gjata vizitorësh të veshur me kostumet tradicionale. Ka një traditë të Festës së Tetorit, që menjëherë pas hapjes, të rinjtë vrapojnë për të zënë një vend të mirë në tendat e birrës. Festa e Tetorit këtë vit zhvillohet nën masa të rrepta sigurie. Rreth 600 policë janë në shërbim për të siguruar një festë të qetë, si edhe rreth 1500 punonjës të rendit publik dhe personel sigurie shtesë. Çmimet e shtrenjta të birrës shkaktuan që më herët debate. Këtë vit çmimi ka kaluar 15 eurot për një krikëll karakteristik të birrës. Një litër birrë kushton nga 13 deri në 15,30 euro. Kush nuk do të fillojë që herët me alkoolin mund të përdorë pijet joalkoolike apo ujin falas në territorin e festës. Festa e Tetorit zgjat 16 ditë, deri më 6 Tetor, mesatarisht vitin e kaluar u konsumuan 6,5 milionë litra birrë. Në Mynih ndërkohë priten miliona vizitorë gjatë ditëve të festës. 7,2 milionë vizitorë erdhën vitin e kaluar nga e gjithë bota duke thyer një rekord që nuk ishte arritur prej 40 vitesh.