Komisioni Qendror i Zgjedhjeve në Kosovë ka ndarë 10 për qind të mjeteve financiare nga Fondi për Mbështetjen e Subjekteve Politike, për periudhën nga 13 shtatori deri më 31 dhjetor. Sipas njoftimit të KQZ-së, deputetëve të Kuvendit të sapokonstituuar u janë ndarë gjithsej 144 mijë euro. Këto mjete, sipas KQZ-së, ndahen “me qëllim të financimit të aktiviteteve dhe punës së secilit deputet”. Komisioni Qendror i Zgjedhjeve ka marrë vendim për pezullimin e Partisë së Ashkalinjëve për Integrim, pasi kjo parti nuk e ka mbajtur kuvendin zgjedhor brenda afatit të përcaktuar. Sipas KQZ, Partia e Ashkalinjëve për Integrim, duhet të kishte mbajtur kuvendin popullor deri më 11 shtator 2026 dhe për këtë është njoftuar disa herë nga Zyra. Sipas vendimit të KQZ-së, ata ishin të detyruar që ta mbanin konventën/kuvendin e saj zgjedhor brenda një afati shtesë prej 45 ditësh. Në rast se partia nuk e përmbush këtë detyrim brenda afatit të përcaktuar, ajo çregjistrohet nga regjistri i partive politike në Kosovë.