21 janari 2025 shënon plot 14 vite nga protesta e 21 janarit të 2011-tës, në bulevardin “Dëshmorë e Kombit” në Tiranë, ku mbetën të vrarë katër qytetarë civilë. Demonstrata u zhvillua nga opozita socialiste e kryesuar nga Edi Rama ndërsa kryeministër ishte Sali Berisha i PD-së, i cili qeveriste në koalicion me LSI-në e Ilir Metë, sot PL. Protesta e 21 janarit 2011 u mbyll me katër viktima, tre të vrarë me armë zjarri në harkun e dhjetë minutave dhe një i plagosur rëndë që do të ndërronte jetë pak ditë më vonë. Ziver Veizi, Aleks Nika, Hekuran Deda dhe Faik Myrtaj janë viktimat e 21 janarit, familjarët e të cilëve vijonë të presin drejtësi. Protesta e 21 janarit 2011 u thirr pas publikimit të videos në emisionin Fiks Fare mes ish-ministrit të ndjerë Dritan Prifti dhe Zv. Kryeministrit Ilir Meta në atë kohë I cili shfaqej me një bllok të zi në dorë. Kryeministri Edi Rama ka reaguar në rrjete sociale në këtë 14-vjetor me një status në rrjete sociale me shprehjen ‘drejtësia vonon por nuk harron’. Kreu I qeverisë, shkruan më tej se kush po e vonon drejtësinë për 21 janarin, nuk duhet të harrojë se fëmijët e dëshmorëve po bëhen prindër duke pritur drejtësinë.