Një video e publikuar nga brenda ambienteve të burgut të Durrësit, ka vënë në lëvizje Drejtorinë e Burgjeve, duke transferuar disa të burgosur. Mes personave të shfaqur në video, dyshohet se po festonte brenda qelisë edhe Lulzim Berisha, ndaj kreu i bandës së Durrësit është transferuar pak ditë më parë në burgun e sigurisë së lartë në Peqin. Top News mëson se në total, pritet transferimi i 19 të burgosurve nga Durrësi në burgje të tjera të sigurisë më të lartë, persona të cilët janë shfaqur në videon që doli nga burgu. Ndërkohë, Durim Bami, nga paraburgimi i Fushë Krujës u transferua po në Peqin, pak javë pasi Drejtoria e Përgjithshme e Burgjeve kishte pranuar kërkesën e tij për t’u zhvendosur nga burgu 313 në Tiranë drejt atij të Fushë-Krujës. Pas ekstradimit në fund të muajit shkurt, Bami kishte kërkuar këtë ndryshim, duke argumentuar se në burgun 313 i rrezikohej jeta. Bami nxirret në oraret e ajrimit vetëm dhe i pashoqëruar nga të tjerët. Sipas një vëzhgimi të Top News, në vetëm 20 ditët e fundit, prej 1 majit, 14 kontrolle të befasishme janë ushtruar me urdhër të drejtorit të përgjithshëm të burgjeve Adriatik Kupi, ku janë gjetur disa aparate celulare dhe sende të tjera të paligjshme.