139 persona janë paraqitur me gastrointestinale, në Qendrën Shëndetësore Fushë-Arrëz gjatë periudhës 24 gusht–3 shtator 2026. Pas rritjes së rasteve, Instituti I Shëndetit Publik ka marrë nën hetim rastet. Sipas raportit, prej 139 personave të prekur, 128 raste, ose 91.7%, janë banorë të Fushë-Arrëzit, me përqendrim të rasteve kryesisht në lagjet “Demokracia” dhe “Nushaj”. Moshat e personave të prekur variojnë nga 2 deri në 94 vjeç. Hetimi i ISHP-së ka vënë në fokus sistemin e furnizimit me ujë, pasi banorët e prekur kanë deklaruar se konsumojnë ujë nga rrjeti publik dhe furnizohen nga i njëjti sistem. Sipas analizave laboratorike, është konstatuar ndotje mikrobiologjike në disa pika të sistemit të furnizimit. Një tjetër gjetje lidhet me lëndën e përdorur për dezinfektimin e ujit. Analiza e hipokloritit të natriumit tregoi se klori aktiv ishte 9.04%, ndërsa kufiri i përcaktuar në raport është 13–15%, duke mos përmbushur kërkesat për përdorim në procesin e klorinimit dhe dezinfektimit të ujit të pijshëm. Në përfundim, raporti vlerëson se nuk janë zbatuar praktikat higjieno-sanitare që garantojnë cilësinë dhe sigurinë e ujit të pijshëm. ISHP rekomandon ndër të tjera pastrimin dhe dezinfektimin e depove dhe linjave të furnizimit, forcimin e procesit të klorinimit, monitorimin sistematik të klorit mbetës dhe marrjen e masave për sigurimin e alternativave të sigurta të furnizimit me ujë deri në përmirësimin e situatës.