Bashkimi Evropian miratoi të mërkurën pakon e 13-të të sanksioneve kundër Rusisë, njoftoi presidenca belge në rrjetin social X. “Ambasadorët e BE-së sapo ranë dakord në parim për pakon e 13-të të sanksioneve në kornizën e agresionit të Rusisë kundër Ukrainës”, tha presidenca belge. Kjo është një prej pakove “më të gjera” të sanksioneve të BE-së kundër Rusisë, sipas Brukselit. Gati 200 subjekte dhe individë janë futur në listën e sanksioneve me pakon e re. Pakoja do të miratohet zyrtarisht në kohë për përvjetorin e dytë të fillimit të pushtimit të Ukrainës nga Rusia, më 24 shkurt. Vetëm dy ditë më parë, shefi i politikës së jashtme në BE, Josep Borrell, tha se blloku duhej të ndëshkonte rusinë me sanksione të reja pas vdekjes së kritikut më të zëshëm të presidentit Putin, Aleksei Navalni, në burgun në Arktik ku ai po mbahej. Sipas Borrell, blloku duhet ti dërgojë me këto sanksione një mesazh mbështetjeje opozitës ruse.