Trembëdhjetë kandidatë kanë depozituar dokumentet për të garuar në zgjedhjet e pjesshme lokale të 9 nëntorit në pesë bashkitë e vendit: Vlorë, Tepelenë, Berat, Mat dhe Cërrik. Pas dorëheqjes së kryebashkiakut Ermal Dredha, një ditë para asamblesë së Partisë Socialite, të majtët hyjnë në këtë betejë elektorale me deputeten Brunilda Mersinin. Ndërkohë nga kampi opozitar, mbështetja është dhënë për Dionis Sotën, i cili vjen nga sektori i turizmit dhe biznesit, teksa si kandidat i pavarur do të garojë edhe këshilltari bashkiak, Gjergj Nika. Në Berat, pas kalimit të Ervin Demos nga pushteti vendor në Kuvend e kabinet qeveritar, socialistët do të hyjnë në garën elektorale me Ervin Cecën, kryetarin e komanduar të Bashkisë së Berat; në ndërkohë që opozita do të mbështesë figurën e Pavlo Shkarpës që vjen nga biznesi. Emërimi i Andis Sallës, ministër i bujqësisë, krijoi vakancë në bashkinë e Cërrikut, ku deri tani ka shërbyer si kryetar i komanduar Florenc Doka, dhe do të jetë po ai që do garojë nën siglën e Partisë Socialiste më 9 nëntor. Ndërkohë opozita mbështet kandidaturën e pavarur të Amarildo Hoxhës, dhe Partia ‘Lëvizja Shqipëria Bëhet; kandidon me Eligert Himën. Në Mat, Partia Socialiste garon me Altin Bojnin ndërkohë që kryetarja e gruas e kësaj force politike, Suzana Pasha do të kandidojë si e pavarur. Opozita mbështet Eduart Brahilikajn. Në bashkinë e Tepelenës, pas largimit të Tërmet Peçi nga pushteti vendor në atë legjislativ, socialistët do të garojnë me kandidaturën e ish kreut të gardës, Gramos Sako ndërsa opozita do të mbështesë kandidaturën e Gabriel Gumës.