12 persona janë arrestuar në Durrës gjatë një operacioni policor, i zhvilluar pas hetimeve disa mujore ndaj një grupi që dyshohet se shpërndante lëndë narkotike në zonat pranë shkollave të qytetit. Mes të arrestuarve ndodhet edhe organizatori i dyshuar i grupit, ndaj të cilit rëndojnë një sërë akuzash, përfshirë prodhim dhe shitje narkotikësh, armëmbajtje pa leje, kontrabandë dhe shkelje të detyrimeve tatimore. Në pranga kanë rënë gjithashtu edhe 11 persona të tjerë, të cilët ishin të përfshirë në këtë aktivitet të paligjshëm, si dhe vijon puna për kapjen edhe të një pjesëtari tjetër të këtij grupi. Nga hetimet dhe provat e siguruara rezulton se këta persona, në bashkëpunim me njëri-tjetrin, ushtronin aktivitetin e paligjshëm të shpërndarjes dhe shitjes së lëndëve narkotike në afërsi apo pranë gjimnazeve të qytetit të Durrësit.