Ashtu sikurse ishte paralajmëruar dhe pritej me jo pak interes, një pjesë e demokratëve i janë përgjigjur thirrjes së ish-kryeministrit Berisha për të qenë pjesë e kuvendit të thirrur nga delegatët. Që prej orës 09.00 të mëngjesit, në ambientet e Air Albania organizatorët kishin menduar deri në detaje organizimin e eventit. Në njërën nga hyrjet ishte menduar vetëm për delegatët dhe në hyrjen tjetër simpatizantë të Partisë Demokratike, apo të ish-kryeministrit Berisha. Në hyrjen e delegatëve, sipas komisionit të Kuvendit ishin vendosur edhe pajisjet identifikuese për delegatët, që do të votonin më pas për ndryshimet statutore, apo shkarkimin e Lulzim Bashës. Në Kuvendin e thirrur nga Berisha, sipas organizatorëve morën pjesë 4934 delegatë, numri i të cilëve shfaqej automatikisht në ekranet e vendosur në ambientet e stadiumit.