Komisioni hetimor parlamentar për shkarkimin e presidentit të republikës, Ilir Meta, ka paraqitur një sërë pretendimesh për shkelje kushtetuese. Numri i lartë i dekreteve për kthim ligji për rishqyrtim në kuvend, është cilësuar nga firmëtarët socialistë, një shkelje kushtetuese, e cila ka ndikuar në shtyrjen në kohë të dekretimit të ministrave si dhe në mbarëvajtjen ekonomike të vendit. Dekreti për rikthim ligji për rishqyrtim është një kompetencë kushtetuese e presidentit, e cila e humbet fuqinë, kur kundër tij votojnë shumica e të gjithë anëtarëve të Kuvendit. Në këto 30 vite demokraci Meta rezulton të jetë presidenti, i cili ka kapur rekord dekretesh, ende pa përfunduar mandatin e tij presidencial. Në këtë legjislaturë Parlamenti i Shqipërisë ka miratuar në total 473 ligje. Nga këto, Ilir Meta, që nga moment kur ka marrë detyrën në 24 korrik të vitit 2017 e deri më sot, ka kthyer për rishqyrtim 105 ligje, pra pothuajse 22 për qind e ligjeve janë kthyer për rishqyrtim. Rast mosdekretimi ministri rezulton vetëm ai i Gent Cakaj, por edhe emri i Sandër Lleshajt solli mospëlqimin e presidentit në momentin kur u propozua. Mosdekretimi i Gent Cakajt, në postin e ministrit të Evropës dhe Punëve të Jashtme, ka bërë që Meta dhe Rama të ballafaqohet institucionalisht në dyert e gjykatës kushtetuese. Për këtë çështje përfaqësuesja ligjore e Këshillit të Ministrave ka sjellë në fokus nenin 98, i cili, sipas saj, nuk i jep asnjë atribut ndryshe Presidentit vecse të dekretoje propozimin e ardhur nga Kryeministri.