Presidenti amerikan Donald Trump, tha se "vetëm koha do të tregojë" se sa gjatë Shtetet e Bashkuara do të mbikëqyrin Venezuelën, në një intervistë të botuar nga Neë York Times të enjten në mëngjes. Kur u pyet nga Times nëse do bëhej fjalë për tre muaj, gjashtë muaj, një vit apo më gjatë, Trump tha: "Do të thoja shumë më gjatë". "Ne do ta rindërtojmë atë vend në një mënyrë shumë fitimprurëse", tha Trump, duke shtuar, "ne do të përdorim naftën dhe do të marrim naftë. Po ulim çmimet e naftës dhe do t'i japim para Venezuelës, para që i nevojiten dëshpërimisht". Trump shtoi se SHBA "po shkon shumë mirë" me qeverinë e presidentes së përkohshme Delcy Rodriguez në Venezuelë tani, sipas Times. Trump të martën zbuloi një plan për të rafinuar dhe shitur deri në 50 milionë fuçi naftë venezueliane që kishte mbetur në Venezuelë nën bllokadën e SHBA-së, në një shenjë të mëtejshme se Uashingtoni po koordinohet me qeverinë venezueliane që nga kapja e Presidentit Nicolas Maduro në një operacion fundjavën e kaluar. Ministri i brendshëm i Venezuelës, Diosdado Cabello, tha ndërkohë se 100 persona kishin humbur jetën në sulmin amerikan.