Ministria e Shëndetësisë në Rripin e Gazës të kontrolluar nga Hamasi tha se që nga e diela, në sulmet izraelite në veri të territorit janë vrarë të paktën 110 palestinezë. Përmes një deklarate të shkurtër, Ministria tha se 50 persona janë vrarë “nga sulmet izraelite mbi shtëpitë në Xhabalia”, duke bërë që numri i viktimave në këtë zonë që nga dita e diel të arrijë në 110. Këto pretendime të Ministrisë së Shëndetësisë në Rripin e Gazës nuk kanë mundur të konfirmohen në mënyrë të pavarur. Të premten, më 15 dhjetor, Ministria e Shëndetësisë në Gazë tha se mbi 18.700 persona janë vrarë që kur Izraeli nisi ofensivën hakmarrëse në Gazë në fillim të tetorit. Lufta nisi pasi grupi radikal, Hamas, kreu sulme të befasishme në jug të Izraelit më 7 tetor. Gjatë këtyre sulmeve u vranë 1.200 persona, shumica civilë, dhe u morën peng afër 240 burra, gra dhe fëmijë. Liderët izraelitë po përballen tani me thirrje ndërkombëtare për arritjen e një armëpushimi të ri me Hamasin, me qëllim që të lirohen më shumë pengje. Por izraeli thotë se ofensiva e tij në Gaza do të vazhdojë deri sa të shkatërrohet hamasi. Ndërkohë vetë gaza është rrënuar tërësisht dhe organizatat ndërkombëtare të ndihmave flasin për katastrofë humanitare.