Karyna Shuliak, një dentiste 37-vjeçare me origjinë nga Bjellorusia, mund të jetë një nga përfitueset kryesore të pasurisë së financierit amerikan Jeffrey Epstein, i cili vdiq në burg në vitin 2019. Sipas The New York Times, Shuliak mund të trashëgojë deri në 100 milionë dollarë, si edhe një diamant të rrallë prej 33 karatësh. Raportohet se ajo dhe Epstein kanë qenë në një lidhje për rreth tetë vjet. Emri i saj është përmendur edhe në dokumentet e publikuara nga Departamenti Amerikan i Drejtësisë, ndërsa thuhet se ishte personi i fundit me të cilin Epstein foli në telefon përpara vdekjes së tij. Mediat amerikane shkruajnë se ata u njohën kur Shuliak ishte 21 vjeçe dhe sapo kishte mbërritur në Nju Jork. Epstein e konsideronte atë si “të preferuarën” e tij dhe, sipas raportimeve, e ndihmoi të regjistrohej në Shkollën e Stomatologjisë të Universitetit Columbia, si edhe të siguronte lejen e qëndrimit në SHBA. The New York Times raporton gjithashtu se Epstein i kishte sugjeruar Shuliakut se martesa me një nga viktimat e tij do të ishte mënyra më e shpejtë për të marrë kartën e gjelbër. Gjatë viteve, çifti udhëtoi në vende të ndryshme të botës, ndërsa ajo thuhet se dërgoi shuma të mëdha parash për familjen e saj në Bjellorusi. Me kalimin e kohës, Epstein i besoi administrimin e një pjese të aseteve të tij, duke nxitur spekulime se Shuliak mund të jetë një nga trashëgimtaret kryesore të pasurisë së tij, e vlerësuar në dhjetëra miliona dollarë. Megjithatë, deri tani nuk ka një konfirmim zyrtar se si do të ndahet trashëgimia.