Vidhte llogaritë e shtetasve të ndryshëm kosovarë në rrjetin social facebook dhe i përdorte ato për të zhvatur në shuma të konsiderueshme parash nga familjarët dhe të afërmit e personave që iu kishte vjedhur llogaritë. Policia e Tiranës ka vënë në pranga 28-vjeçarin Liridon Peka, që besohet se përmes këtij aktiviteti ka përfituar mbi 100 mijë euro. I riu, pasi siguronte akses në adresat e personave që shënjestronte, u shkruante personave që kishte në kontaktet e Facebook mesazhe ku kërkonte ndihmë financiare me pretendimin se ishte shtruar në spital. Në cilësinë e provave material policia sekuestroi shtatë karta bankare, dy laptopë, pajisje të tjera kompjuterike dhe 62 fatura që dëshmonin tërheqjen e shumave monetare nga viktimat e tij. Policia u vu në lëvizje pas kallëzimeve të marra nga disa shtetas kosovarë, për vjedhjen e llogarive të tyre në rrjetet sociale dhe përdorimin për të kërkuar para nga familjarët e tyre.