Disa persona janë lënduar pasi më shumë se 100 makina u përplasën me njëra tjetrën në një pjesë të ngrirë të një autostrade në qytetin Kinez Suzhou. Media kineze raportoi të premten aksidentin më të fundit të shkaktuar nga kushtet ekstreme të motit. Pamje dramatike nga televizioni shtetëror CCTV dhe mediat sociale, tregonin një numër të madh makinash të përplasura në autostradë, me njërën prej tyre madje të ngulur në asfalt dhe me pjesën e pasme në ajër. Copa xhamash dhe mbetje të tjera shiheshin të shpërndara ngado. Javët e fundit, pjesë të mëdha të kinës janë goditur nga valët e të ftohtit të pazakontë dhe nga shi i akullt, duke shkaktuar pasoja të rënda në transport në një kohë kur miliona njerëz nxitojnë të kthehen në shtëpitë e tyre për festën e vitit të ri hënor. Qeveria këtë javë rriti gatishmërinë e saj për shkak të temperaturave të acarta dhe nisi zbatimin e disa planeve për lirimin e trafikut, furnizimin me mallra dhe energji elektrike në shumë provinca e qytete, përfshirë Pekinin, Hebein, Hubein etj.