Kompanitë e armëve nuk kanë fituar kurrë kaq shumë sa në vitin 2024, sipas raportit më të fundit të Institutit Ndërkombëtar të Kërkimeve për Paqen në Stokholm lidhur me 100 firmat më të mëdha të prodhimit të armëve në botë. Vitin e kaluar të ardhurat e tyre nga shitja e armëve dhe e shërbimeve ushtarake arritën në 679 miliardë dollarë. Kjo përbën një rritje prej 5.9 përqind krahasuar me vitin 2023. Edhe atëherë përshkallëzimi i tensioneve gjeopolitike dhe mbi të gjitha lufta në Ukrainë çuan në rritjen e kërkesës për armë. Kjo tendencë u përshpejtua më tej në vitin 2024 dhe ekspertët vlerësojnë se lufta në ukrainë është mirë për biznesin. Nga 100 kompani të listuara, 39 prej tyre e kanë qendrën në SHBA që është padyshim vendi më i rëndësishëm për industrinë e prodhimit të armëve. Këto 39 kompani përfitojnë thuajse gjysmën e të ardhurave botërore nga shitja e armëve. Megjithatë rritja e tyre prej 3.8 përqind është ende relativisht modeste. Kurse 26 kompanitë evropiane, pa Rusinë, shënuan së bashku një rritje prej 13 përqindësh të të ardhurave. Kompanitë gjermane arritën madje një rritje prej 36 përqindësh. Kjo pasi pati një rritje të ndjeshme të kërkesës në kompani si Rheinmetall dhe Diehl, që prodhuan tanke, transportues të blinduar dhe municione, në masë.