Grupi parlamentar i Partisë Socialiste vetëm pesë ditë pas fitimit të zgjedhjeve të 25 Prillit ka filluar mbledhjen e firmave të deputetëve për shkarkimin e presidentit Ilir Meta. Në kërkesën me 50 firma deputetësh drejtuar kryetarit të kuvendit, Gramoz Ruçit, ky grup parlamentar shpjegon qartazi shkeljet e rënda kushtetuese për të cilat akuzohet presidenti Ilir Meta. Prej më shumë se një viti presidenti i vendit ka përdorur dekretin e tij për kthimin e ligjeve për shqyrtim në parlament, gjë që ka rezultuar në hyrje të vonuar të nismave ligjore në fuqi. Socialistët akuzojnë Metën për dëme të konsiderueshme të ekonomisë dhe financave të vendit si dhe cënim të jetës parlamentare duke mos dekretuar ministra dhe marrëveshje financiare. Për sa i përket titujve dhe dekoratave të dhëna nga kreu i shtetit Socialistët pretendojnë se janë kryer pa përmbushur kriteret ligjore dhe pa ndjekur procedurat përkatëse.