Mediat kosovare raportojnë se numri i terroristëve serbë të vrarë gjatë përplasjes së armatosur në Banjskë të Zvecanit, ka shkuar në 10 edhe pse sipas njoftimit zyrtar të Policisë, tre sulmues janë vrarë dhe gjashtë janë arrestuar. Vetë ministri i punëve të brendshme të Kosovës, Xhelal Svecla, konfirmoi mbrëmjen e të dielës se numri i të vrarëve mes terroristëve mund të jetë më i madh. Zvecla tha se disa prej sulmuesve janë identifikuar tashmë si pjesëtarë të mbrojtjes civile, grup ky i shpallur terrorist nga qeveria e Kosovës. Ndërkohë, prokurori special i rastit në veri, Naim Abazi, tha se gjatë të hënës ka vijuar puna me lokalizimin e disa shtëpive dhe automjeteve në banjshkë të Zvecanit, ku dyshohet se ka armatim dhe se po punohet për të identifikuar persona të tjerë të dyshuar, të lidhur me rastin. Abazi tha se aksioni vazhdon dhe se po ndërmerren edhe hapa shtesë. Hetuesit kanë sekuestruar edhe disa kamera në manastir, imazhet e të cilave do të ndihmojnë në identifikimin e terroristëve. Prokuroria Speciale e Republikës së Kosovës, një natë më parë njoftoi se 6 persona janë ndaluar për përfshirje në sulmin ndaj Policisë, nën akuzat për vepra terroriste në Banjskë të Komunës së Zveçanit.