Negociatorët takohen sërish të premten në kryeqytetin e Katarit, Doha, në përpjekje për të arritur një marrëveshje armëpushimi në Gaza, ndërsa Izraeli vazhdon të godasë objektivat në enklavën palestineze. Zyrtarët shëndetësorë të Gazës raportuan të enjten se numri i të vdekurve atje kishte kaluar 40,000 njerëz pas më shumë se 10 muaj luftimesh. Ky raund negociatash nisi të enjten dhe bisedimet rifilluan të premten për të dytën ditë radhazi, thanë zyrtarët e Katarit dhe të SHBA-së. Një zyrtar amerikan i informuar mbi diskutimet në Doha, i cili nuk pranoi të identifikohej, i tha Reuters se bisedimet e së enjtes ishin "konstruktive". "Kjo është punë jetike. Pengesat e mbetura mund të kapërcehen dhe ne duhet ta mbyllim këtë proces," u tha gazetarëve në Shtëpinë e Bardhë zëdhënësi i sigurisë kombëtare të SHBA, John Kirby. Izraeli, ndërkohë, vazhdoi sulmin e tij në Gaza. Zyrtarët shëndetësorë të Gazës thanë se të paktën gjashtë palestinezë u vranë të enjten mbrëma në një sulm ajror izraelit në një shtëpi në Xhabalia në Rripin verior të Gazës. Trupat izraelite më herët goditën objektiva në qytetet jugore të Rafahut dhe Khan Younisit. Në një deklaratë të lëshuar vonë të enjten në Telegram, anëtari i Byrosë Politike të Hamasit, Hossam Badran tha se operacionet e vazhdueshme të Izraelit ishin një pengesë për përparimin e bisedimeve për një armëpushim. Zyrtarët e Hamasit nuk iu bashkuan bisedimeve të së enjtes. Badran tha se bisedimet duhet të shkojnë drejt zbatimit të një marrëveshjeje kuadër të pranuar më parë dhe të cojnë në një armëpushim të plotë, tërheqje të forcave izraelite, kthimin e palestinezëve të zhvendosur dhe një marrëveshje shkëmbimi pengjesh.