Presidenti amerikan Donald Trump ka dislokuar 10,000 trupa amerikane, bombardues të aftë që të mbajnëarmë bërthamore dhe njësinë më elitare të operacioneve speciale të Amerikës, "Night Stalkers", në ujërat pranë Venezuelës. Karaibet tani po përgatiten për përballjen më shpërthyese në dekada, ndërsa presidenti i venezuelës Nicolás Maduro po e fut vendin në një gjendje lufte dhe zotohet të zmbrapsë çdo sulm amerikan. Në një përshkallëzim dramatik, tre bombardues B-52, të njëjtët bombardues të rëndë të përdorur në Irak dhe Siri, fluturuan për orë të tëra pranë brigjeve të Venezuelës këtë javë. Ndërkohë, helikopterë luftarakë nga Regjimenti i 160-të i Aviacionit të Operacioneve Speciale, i njohur si Night Stalkers, kryen fluturime në nivel të ulët vetëm 140 km larg nga territori i Venezuelës. Njësia e famshme, që mori pjesë në operacionin e vrasjes së Osama bin Ladenit, është e specializuar në misione nate, vepron me shpejtësi rrufeje dhe në lartësi të ulët dhe shpesh transporton në aksion Berretat e gjelbra, Navy SEAL-sat apo Forcat Delta. Marina Amerikane tani ka tetë anije luftarake dhe një nëndetëse bërthamore që patrullojnë në Karaibe. Pjesa më e madhe e forcës amerikane është vendosur në Porto Riko, me rreth 2,200 marinsa të stacionuar në anije sulmi amfibe. Pentagoni ka vendosur gjithashtu avionë luftarakë F-35B, aeroplanë spiunë P-8 Poseidon dhe dronë MQ-9 Reaper në rajon. Por disa ekspertë paralajmërojnë se mbrojtja ajrore e venezuelës, me sistemet ruse S-300 dhe raketat SA-24, përbën rrezik serioz për helikopterët amerikanë që do të tentonin të hynin në hapësirën ajrore të Venezuelës. Dislokimi ushtarak, më i madhi në Karaibe që nga vitet 1980, vjen pas të paktën gjashtë sulmeve vdekjeprurëse mbi anije pranë bregdetit të Venezuelës, të cilat Uashingtoni pretendon se transportonin drogë.