Në shpërndarjen e ndihmës ekonomike janë evidentuar shkelje dhe parregullsi – sipas një raporti të detajuar të shërbimit social shtetëror. Pavarësisht parashikimeve ligjore, një numër i konsiderueshëm familjesh rezultojnë përfitues të ndihmës ekonomike edhe pse jetojnë të kushte të mira apo kanë të ardhura të padeklaruar nga puna, emigracioni dhe aktivitetet bujqësore. Një formë abuzimi me ligjin për asistencën sociale në republikën e Shqipërisë, është ajo e shkëputjes nga trungu familjar për të përfituar më shumë mbështetje, edhe pse familja jeton në të njëjtën çati. Qarku i Korçës rezulton të ketë më shumë shkelje sa i takon shpërndarjes së ndihmës ekonomike. Rreth nëntë për qind e familjeve përfituese, ligjërisht nuk duhej të kishin përfitime monetare nga asistenca sociale. Bashkia e Pogradecit është identifikuar si një nga njësitë më problematike, me numrin më të lartë të përfituesve në qark. Elbasani është qarku i dytë më problematik, pasi tetë për qind e familjeve të verifikuara nuk duhej të ishin përfituese të ndihmës ekonomike. Rezulton se përfituesit në fakt jetojnë në kushte të mira dhe sigurojnë të ardhura nga emigrimi ose puna sezonale. Njësitë më problematike janë Rrajcë dhe Qukës në Prrenjas, Gjocaj në Peqin, dhe Shushicë në Elbasan.