Shefja e Komisionit Evropian, Ursula von der Leyen, njoftoi për 1 miliard dollarë ndihmë për Libanin, gjatë vizitës së saj në këtë vend që po përjeton një krizë ekonomike, e cila është përkeqësuar nga kriza e emigrantëve dhe kërcënimi për luftë me Izraelin. “Ju njoftoj për paketën financiare prej 1 miliard dollarësh për Libanin, që do të ndahet nga ky vit deri më 2024-ën”, tha ajo, duke shtuar se BE “dëshiron të kontribuojnë në stabilitetin socio-ekonomik të Libanit”. Presidentja e KE-së tha se ndihma është projektuar që të forcojë shërbimet bazë, si arsimi dhe shëndetësia. Ajo i bëri thirrje vendit që të miratojë reforma, duke theksuar se “Libani ka nevojë për një hov pozitiv ekonomik, që do të krijonte mundësi për bizneset dhe qytetarët”. Von der Leyen tha se BE-ja është e përkushtuar që të ruajë “rrugët e hapura ligjore për në Evropë” dhe për të zhvendosur refugjatët në bllok. Por, ajo shtoi se “në të njëjtën kohë, BE pret bashkëpunimin e Libanit për të parandaluar emigrimin ilegal dhe për të luftuar kontrabandën e emigrantëve”. Libani po përballet aktualisht me një krizë të gjatë financiare. Por, vendi prej pothuajse shtatë muajsh, po përballet edhe me përleshjet në kufi mes grupit militant Hezbollah dhe Izraelit.