Punëtorët dhe aktivistët në mbarë botën shënuan të hënën Ditën e 1 Majit me protesta përmes të cilave kërkonin paga më të larta, ulje të orarit të punës dhe, në përgjithësi, kushte më të mira pune. Në Francë, sindikatat kanë planifikuar demonstrata masive për të protestuar ndaj nismës së presidentit Emmanuel Macron për ta rritur moshën e daljes në pension nga 62 në 64 vjeç. Organizatorët e shohin reformën e pensioneve si kërcënim për të drejtat e punëtorëve dhe rrjetin e sigurisë sociale të Francës. Ashtu si në vitet e mëparshme, policia në Turqi pengoi një grup demonstruesish të arrinte në sheshin kryesor të Stambollit, Taksim, dhe arrestoi disa protestues, sipas raportimeve nga stacioni televiziv i pavarur, Sozcu. Edhe gazetarët, që përpiqeshin të filmonin protestuesit që tërhiqeshin me forcë në makinat e policisë, u shtynë ose u ndaluan. Sheshi Taksim ka rëndësi simbolike për sindikatat e Turqisë pasi persona të armatosur dhe të panjohur hapën zjarr ndaj njerëzve që festonin Ditën e 1 Majit atje në 1977, duke shkaktuar dhjetëra viktima. Në Pakistan, autoritetet kanë ndaluar tubimet në disa qytete për shkak të situatës së tensionuar të sigurisë.