Brenda gomës së këtij furgoni u gjetën 1 kilogram heroinë, pas një aksioni nga policia e Elbasanit. Furgoni u ndalua për kontroll në aksin rrugor "Bulqizë–Librazhd”, brenda së cilit u gjet një çantë e mbushur me drogë si dhe shuma parash në lekë, euro dhe dinarë. Në pranga ka rënë shtetasi nga Maqedonia e Veriut që e kishte siguruar heroinën dhe futur atë në Shqipëri përmes kufirit të gjelbër. Po ashtu është arrestuar edhe personi që e priti drogën në Shqipëri, me qëllim shitjen e saj në vendin tonë. Në përfundim të veprimeve procedurale 32 vjeçari nga Struga dhe 45-vjeçari nga Durrësi, u arrestuan në flagrancë për veprën penale “Trafikimi i lëndëve narkotike”, kryer në bashkëpunim. Gjithashtu, u sekuestruan me cilësinë e provës materiale, lënda e dyshuar narkotike, automjeti (furgon) tip “Fiat”, 2 celularë, si dhe 40 000 lekë, 50 euro dhe 290 denarë. Hetimet tashmë i kalojnë prokurorisë së Elbasanit.