Katër persona kanë humbur jetën në Japoni pasi tajfuni Dujuan goditi Tokion dhe prefekturat përreth me shira të rrëmbyeshëm dhe erëra shkatërruese, sipas raportimeve lokale. Stuhia la pa energji elektrike 50,000 njerëz dhe shkaktoi pezullimin e qindra fluturimeve. Shumica e urdhrave për evakuim u hoqën të martën, ndërsa stuhia largohej nga bregu lindor i Japonisë. Në kulmin e stuhisë të hënën, autoritetet paralajmëruan për një "kërcënim të menjëhershëm për jetën" dhe u bënë thirrje 1.9 milionë njerëzve të zhvendoseshin në strehime të sigurta. Viktimat humbën jetën si pasojë e rrëshqitjeve të dheut në prefekturat Kanagaëa dhe Chiba. Gjashtë persona të tjerë u raportuan të zhdukur, njoftoi transmetuesi publik NHK. Dujuan shoqërohej nga erëra me shpejtësi 130 deri në 194 km në orë. Ky tajfun është më i fundmi në një seri stuhish në Paqësor, të intensifikuara nga fenomeni "super El Niño", i cili ka ngrohur oqeanin duke nxitur formimin e stuhive. Autoritetet kishin këshilluar publikun që t'u kushtonte vëmendje informacioneve mbi motin. Dujuan, tajfuni i 25-të i vitit për Japoninë, goditi vendin në mes të një periudhe pushimesh pesëditore dhe detyroi anulimin e shumë aktiviteteve. Kryeministrja e Japonisë, Sanae Takaichi, shprehu ngushëllimet e saj në një postim në platformën X për ata që humbën jetën nga tajfuni, përpara se të deklaronte se do të vazhdonte udhëtimin e planifikuar drejt Shteteve të Bashkuara.