Bashkimi Evropian ka vënë në dispozicion 1.5 miliardë euro në mbështetje Ukrainën. Ky është kësti i parë i parave të marra nga asetet e ngrira ruse. Kjo ndihmë vjen disa muaj, pasi vendet anëtare të BE-së, arritën një marrëveshje për të përdorur 210 miliardë euro nga asetet e bankës qendrore ruse. “BE qëndron me Ukrainën. Sot ne transferojmë 1.5 miliardë euro të ardhura nga asetet ruse për mbrojtjen dhe rindërtimin e Ukrainës. Nuk ka simbol apo përdorim më të mirë për paratë e Kremlinit sesa ta bëjmë Ukrainën dhe të gjithë Evropën një vend më të sigurt për të jetuar”, tha në një deklaratë presidentja e Komisionit Evropian, Ursula von der Leyen. Këto para do të shërbejnë për mbështetje ushtarake për Ukrainën, por edhe për rindërtimin e vendit të shkatërruar nga lufta. Paratë, shumica e të cilave mbahen në Belgjikë, u ngrinë si pjesë e paketave të sanksioneve kundër Rusisë, pasi pushtoi Ukrainën në shkurt të vitit 2022. Kjo paketë vjen disa ditë pasi Moska njoftoi se kishte rimarrë dy fshatra në Ukrainën Lindore, duke rritur kështu shqetësimet se Kremlini mund të përparojë më shumë, nëse Kievi nuk do të ketë mbështetje financiare.