Rreth 1.1 milion njerëz kanë shkuar nga Ukraina në Gjermani më 2022, duke tejkaluar fluksin e migrantëve nga Lindja e Mesme më 2015, sipas të dhënave të Zyrës federale të Statistikave të Gjermanisë. Dy të tretat e migrantëve nga Ukraina kanë shkuar në Gjermani në tre muajt e parë pas nisjes së luftës së Rusisë në Ukrainë, përkatësisht në periudhën mars-maj të vitit të kaluar. Të dhënat janë publikuar pak para se lufta e Rusisë në Ukrainë të mbushë një vit. Duke përjashtuar personat që janë kthyer sërish në Ukrainë, numri i migrantëve ukrainas në Gjermani ka shkuar në 962.000 në 2022, më shumë se 834.000 personat e ardhur nga Siria, Afganistani dhe Iraku në Gjermani, në periudhën 2014-2016, thuhet në raportin më të ri. Këto shifra i kanë kthyer shtetasit ukrainas në popullatën e dytë më të madhe të migrantëve në Gjermani, pas turqve.