Bashkia Poliçan zhvilloi këtë të premte një mbledhje emergjente të Këshillit Bashkiak, ku u votua kundër projektligjit për Ndarjen Administrative Territoriale, që propozon shkrirjen e Bashkisë Poliçan dhe bashkimin me Beratin. Draft projekt ky I hedhur në konsultim nga Partia Socialiste që kërkon reduktimin e bashkive në 46 të tilla. Gjatë mbledhjes së zhvilluar, ishte I pranishëm dhe kryebashkiaku i Poliçanit, Adriatik Zotkaj, I cili argumentoi se asnjë nga pikat e propozuara në relacionin e qeverisë për shkrirjen e Bashkisë Polican nuk qëndron. “Do të jetë një turp për Parlamentin nëse voton pro shkrirjes së kësaj bashkie”, tha kryebashkiaku gjatë mbledhjes. Ai tha se Bashkia Poliçan duhet të vijojë të ketë këtë funksion, pasi aktualisht ka 318 biznese që, sipas tij, po lulëzojnë çdo ditë, ka turizëm malor dhe industrial, si dhe ka implementuar projekte për rininë e moshën e tretë. Pasi u njohën me raportin e Komisionit të ngritur nga Këshilli Bashkiak për kryerjen e dëgjesave publike me qytetarët, ku shprehej indinjata e tyre e thellë për këtë propozim të qeverisë, që e cilësojnë absurd dhe të padrejtë, këshilltarët votuan me 15 vota kundër shkrirjes së bashkisë Poliçan.