Kundërshtarët e presidentit Emmanuel Macron kritikuan komentet e bëra prej tij të hënën se një fitore e partisë të së ekstremit të djathtë Bashkimi Kombëtar, ose e aleancës së Frontit të Ri Popullor, do ta çonte Francën në luftë civile. Ndërsa zgjedhjet e 30 qershorit po afrojnë partitë politike në Francë janë përfshirë në akuza e kudnër akuza. Presidenti i partisë Bashkimi Kombëtar (RN), Jordan Bardella gjatë një emisioni për kanalin M6 tha se një president nuk duhet të thotë gjëra të tilla. “Unë dëshiroj të rikthej sigurinë për të gjithë popullin francez... Këta janë që i trembin francezët. Jemi një vit pas trazirave që goditën rëndë qytetet franceze. Çdo ditë në vendin tonë, miliona francezë, në veçanti gratë në vendin tonë, në publik, në mjetet e transportit publik, nuk ndihen të sigurta”, nënvizoi ai duke vënë në dukje nivelin e kriminalitetit në vend dhe duke premtuar një rikthim të autoritetit të qeverisjes në mbarë vendin. Me ton kritik u përgjigj edhe drejtuesja tjetër e kësaj partie Marine Le Pen. “Nuk ka ndryshuar shumë... Të gjitha fushatat presidenciale i ka bërë duke thënë “Ose unë, ose kaosi”. Mendoj se francezët e kanë kuptuar se ai është kaosi”, tha Le Pen.