Zëdhënësi i KFOR-it në Kosovë, koloneli Andrea Gallieni, tha se disa grupe kriminale qendrojnë pas protestave të dhunshme në Zveçan, më 29 maj. Gallieni tha se grupet e dhunshme janë organizuar për të sulmuar, dhe se i takon Policisë së Kosovës që t’i identifikojë ato. Atë ditë protestuesit serbë u përleshën me pjesëtarë të KFOR-it, dhe pati të plagosur nga të dyja anët. Në një konferencë për shtyp, Gallieni, komentoi të premten ngjarjet në veri të Kosovës. “Është shumë e rëndësishme që të gjitha palët të përmbahen nga veprimet hakmarrëse. Sepse, siç e kanë dëshmuar edhe këto ngjarje, gjithçka mund të përshkallëzohet në nivel të madh të dhunës, prandaj është shumë e rëndësishme që të gjitha palët t’i kenë parasysh pasojat dhe rreziqet e veprimeve të tyre”. Ai tha se të dyja palët duhet të mbajnë përgjegjësi.