Misioni i Bashkimit Evropian për Sundimin e Ligjit në Kosovë, EULEX, dërgoi gjashtë këshilltarë policorë të cilët do të punojnë në katër stacionet e Policisë së Kosovës në veri të vendit. Dërgimi i ekipit është bërë të enjten dhe ka për qëllim përforcimin e kapacitetit këshillues dhe monitorues të këtij misioni, bëri të ditur EULEX. Dislokimi do të zgjasë fillimisht për dy muaj, me mundësinë e vazhdimit “derisa Misioni të ketë krijuar kapacitet afatgjatë këshillues policor në veri të Kosovës”. “Në mënyrë të veçantë, ekipi i EULEX-it do të këshillojë Policinë e Kosovës se si t’i kryejë më mirë aktivitetet e rregullta policore gjatë parandalimit dhe luftimit të krimit dhe ofrimit të sigurisë, duke e monitoruar gjithashtu respektimin e detyrimeve të tyre për të drejtat e njeriut, për t'i shërbyer komuniteteve që ata i mbrojnë dhe për ta rritur besimin e popullatës përmes punës policore të orientuar në komunitet”, njoftoi EULEX. Tre nga këta pjesëtarë janë nga Holanda dhe tre të tjerë nga Suedia. “...Duke u bazuar në përvojën dhe ekspertizën e tyre policore në komunitet, do të punojnë në komunat veriore në koordinim të ngushtë me kolegët e tyre të Policisë së Kosovës dhe me Këshilltarët e Lartë Policorë të EULEX-it, të cilët e këshillojnë Drejtorinë Rajonale të Policisë në Mitrovicën e Veriut dhe katër stacionet policore nën komandën e saj”, bëri të ditur EULEX. Tensionet në veri të Kosovës janë ngritur që nga fundi i majit dhe arritën kulmin më 24 shtator, kur policia e kosovës u vendos nën sulm nga serbë të armatosur në Banjskë të Zvecanit. Një polic kosovar humbi jetën në këtë sulm si edhe tre agresorë serbë.