Drejtoresha e shkarkuar e filialit të Postës në Durrës, Elisabeta Mataj, ish-shefja e financës Valbona Duni, si dhe arkëtarja Paola Dana, janë ndaluar pasditen e së mërkurës në kuadër të hetimit për abuzimet me fondet e shërbimit të pagesave për qytetarët. Pas kallëzimit penal të depozituar nga Posta Shqiptare, prokurori, Gazmend Frëngu, ka nisur menjëherë veprimet hetimore. Tre të dyshuarat janë paraqitur fillimisht në Prokurorinë e Durrësit për t'u marrë në pyetje dhe më pas janë ballafaquar në ambientet e Drejtorisë së Përgjithshme të Policisë së Shtetit. Në përfundim të këtyre veprimeve, prokurori ka urdhëruar ndalimin e tyre. Hetimi lidhet me dyshimet për shpërdorim detyre, përvetësim fondesh dhe parregullsi në administrimin e dokumentacionit financiar të filialit të Postës Shqiptare në Durrës. Grupi hetimor po verifikon të gjitha lëvizjet financiare, procedurat e ndjekura dhe dokumentacionin e administruar nga filiali. Paralelisht me hetimin penal, Drejtoria e Përgjithshme e Postës Shqiptare ka nisur sot një auditim të dytë të brendshëm në filialin e Durrësit. Kontrolli i thelluar financiar pritet të zgjasë përgjatë javëve në vijim, ndërsa gjetjet do t'i vihen në dispozicion Prokurorisë si pjesë e materialeve hetimore.