Mbi 94 milionë evropianë po përballen me një valë ekstreme të nxehti, me temperatura mbi 35 gradë celsius. Të mërkurën, temperatura rekord u regjistruan në Mbretërinë e Bashkuar, Francë, Spanjë, Gjermani dhe pjesë të tjera të Evropës. Në Angli termometri shënoi 35.7 gradë celsius, dita më e nxehtë e shënuar ndonjëherë në muajin qershor, raportoi BBC. Për pasojë, qindra shkolla u mbyllën para kohe, për shkak të të nxehtit ekstrem. Rekord u regjistrua edhe në Skoci, ku u regjistrua dita më e nxehtë e vitit, me temperatura që arritën deri në 29.4 gradë. Franca po përballet me një mot ekstrem me temperatura mbi 40 gradë celsius, ku të martën përjetoi natën më të nxehtë të regjistruar ndonjëherë. Vala e të nxehtit shkaktoi të paktën 48 viktima nga mbytjet që nga 18 qershori, ndërsa autoritetet zgjeruan alarmin e kuq në pothuajse gjithë territorin. Në Itali, Ministria e Shëndetësisë ka shpallur alarm të kuq për të nxehtin në 16 qytete, përfshirë Milanon dhe Romën. Rekordi i nxehtësisë u thye edhe në Spanjë, me temperaturat më të larta, që nuk ishin shënuar të paktën që prej vitit 1950. Termometri në Spanjë regjistroi të martën vlerën e 39.3 gradë. I nxehti ekstrem që ka mbërthyer pjesën më të madhe të Evropës Perëndimore, ka sjellë edhe probleme serioze në infrastrukturë. Me mijëra familje në Francë kanë mbetur pa energji elektrike. Në kulmin e të nxehtit, mbi 100 mijë konsumatorë u prekën nga ndërprerjet e energjisë, problem që u shkaktua nga temperaturat e larta. Ekspertët theksojnë se valët e të nxehtit po bëhen më të gjata, më të shpeshta dhe më intensive për shkak të ndryshimeve klimatike, duke vënë nën presion rrjetet energjetike dhe infrastrukturën e ndërtuar dekada më parë.