Tatimi i super të pasurve nuk e kaloi testin e votës në Zvicër. Socialistët e rinj zviceranë synonin të tatonin super të pasurit dhe t'i përdornin të ardhurat për të financuar masat për mbrojtjen e klimës. Por nisma dështoi në referendum. Zviceranët e hodhën poshtë me shumicë votash aplikimin e një takse mbi trashëgiminë për super të pasurit. Iniciativa e organizatës rinore të socialistëve Juso "Për një politikë sociale ndaj klimës të financuar përmes taksave", e cila synonte që të vendosej një taksë prej 50 përqind mbi trashëgimitë që tejkalojnë 50 milionë franga zvicerane, nuk arriti të merrte dritën jeshile të elektoratit vendas. Autoritetet njoftuan se propozimet kishin dështuar, për shkak se në masë të madhe, edhe kantonet kishin votuar kundër tyre. Për kërkesa të tilla nevojiten si shumica e votave të përgjithshme, ashtu edhe shumica e votave në kantone. Në Zvicër ka rreth 2.500 tatimpagues me një pasuri që tejkalojnë 50 milionë franga zvicerane. Të gjithë së bashku ata zotërojnë një pasuri me vlerë rreth 500 miliardë franga zvicerane. Nëse nisma do të ishte miratuar taksimi i trashëgimive mund të gjeneronte teorikisht katër miliardë franga të ardhura shtesë nga taksat. Sipas planeve të Juso-ve, të ardhurat do të përdoreshin për të financuar projekte për mbrojtjen e klimës. Kundër taksës, u angazhua një koalicion i gjerë partish politike dhe shoqatash biznesi, të cilat insistuan se kjo lëvizje mund t`i shtynte individët e pasur të largoheshin jashtë vendit, duke ulur kështu të ardhurat e përgjithshme tatimore.