Ndërtesa e Komunës së Zveçanit është sulmuar me një mjet shpërthyes, që besohet të jetë granatë dore, e pohuar kjo nga zëvendësdrejtori i Policisë së Kosovës për veriun, Veton Elshani. Shpërthimi ndodhi pak para mesnatës së djeshme. Granata besohet të ketë qenë e llojit M-75. Ky është sulmi i dytë brenda dy ditësh ndaj institucioneve në këtë komunë me shumicë serbe, pas sulmit po me granata dore ndaj një stacioni policor. Nga shpërthimi i fundit, vec ndërtesës së komunës, dëme kanë pësuar edhe katër automjete të parkuara aty pranë, por fatmirësisht nuk ka asnjë të lënduar. Elshani pohoi po kështu se policia ende nuk ka identifikuar ndonjë të dyshuar për ngjarjen. Komuna e Zveçanit drejtohet nga një kryetar shqiptar që prej vitit të kaluar pasi serbët dhanë dorëheqje nga institucionet e Kosovës dhe i bojkotuan zgjedhjet komunale në prill të atij viti. Kryetari i komunës së Zvecanit, Ilir Peci e dënoi ashpër këtë akt të papranueshëm dhune, sic tha ai, duke kujtuar sesi një sulm i ngjashëm ndodhi edhe në stacionin policor. Vitet e fundit janë regjistruar disa episode të ngjashme në veri të Kosovës. Hedhja e mjeteve shpërthyese dhe djegia e automjeteve kanë pësuar rritje sidomos gjatë periudhës kur po zbatohej vendimi i Qeverisë së Kosovës për kthimin e targave serbe në ato RKS – Republika e Kosovës.