Një vatër e re e rrezikshme zjarri ka shpërthyer në shpatin e malit të Krujës, e për pasojë qeveria ka lëshuar një urdhër evakuimi urgjent për banorët në zonat e Barabit e Llubanit, në Bashkinë Krujë. Procesi po realizohet në koordinim me Agjencinë Kombëtare të Mbrojtjes Civile, Prefektin e Qarkut Durrës dhe strukturat e Emergjencave Civile të Bashkisë Krujë, me mbështetjen e MZSH-së, Policisë së Shtetit dhe Forcave të Armatosura. Banorët e zonës ftohen të ndjekin udhëzimet e autoriteteve në terren dhe të bashkëpunojnë me strukturat e emergjencave. Policia bën me dije se për rastin e zjarrit në Krujë ka reaguar menjëherë duke vënë në pranga autorin e dyshuar të kësaj zjarrvënieje. Megjithatë, dëmi në terren është i madh. Flakët po ngjiten me shpejtësi drejt majës së malit dhe po rrezikojnë direkt rreth 30 banesa në fshatin Abaze, si dhe disa biznese aty pranë. Për shkak të terrenit të thyer, ka nisur një operacion masiv nga ajri me 3 helikopterë zjarrfikës. Në tokë, krahas forcave të emergjencave, dhjetëra banorë u janë bashkuar përpjekjeve për të izoluar flakët me mjete rrethanore. Në anën tjetër të vendit, në rrethin e Mallakastrës, është riaktivizuar vatra e zjarrit në fshatin Panahor, ndërsa një vatër tjetër ka shpërthyer në fshatin Koilaç. Policia ndërhyri në kohë rekord duke evakuuar disa familje që rrezikoheshin direkt.