Një zjarr i përmasave të konsiderueshme, i rënë në zonën e Malasejt në Cërrik, është shuar pas ndërhyrjes së forcave zjarrfikëse, duke shmangur përhapjen e flakëve drejt banesave dhe një prej burimeve të rëndësishme të furnizimit me ujë të qytetit. Nga zjarri janë përfshirë nga flakët rreth 2 hektarë sipërfaqe toke, ndërsa dëmet materiale janë të konsiderueshme, pasi raportohet se janë djegur rreth 250 rrënjë ullinj. Situata ka qenë veçanërisht shqetësuese për shkak të afërsisë së vatrës me disa banesa, si dhe me depon e ujit që furnizon qytetin e Cërrikut. Përhapja e flakëve në drejtim të këtyre objekteve përbënte një rrezik të drejtpërdrejtë, por ndërhyrja në kohë e shërbimit zjarrfikës bëri të mundur izolimin dhe shuarjen e zjarrit. Në operacionin për shuarjen e flakëve u angazhuan 3 automjete zjarrfikëse dhe 11 efektivë, të cilët punuan për neutralizimin e vatrës dhe parandalimin e përhapjes së saj në sipërfaqe të tjera. Sipas të dhënave paraprake, dyshohet se zjarri mund të jetë shkaktuar nga një shkëndijë elektrike e ardhur nga linja e energjisë, ndërsa shkaku përfundimtar pritet të përcaktohet pas verifikimeve përkatëse.